健康資訊 - 眼睛曬傷好易有眼疾？

眼科資訊

眼睛曬傷好易有眼疾？

長時間喺戶外工作、活動人士要注意！眼睛要做好防曬，最好戴上有效防UV嘅太陽眼鏡，以減少紫外光對雙眼嘅傷害。否則眼睛有機會因為長期受到紫外光照射，而增加患上以下眼疾嘅機會！

眼翳
眼睛結膜受過多紫外線照射，容易長出翼狀贅肉，初期冇明顯症狀，所以可能被忽略。但當眼翳漸漸蔓延到角膜中央並遮住瞳孔，就有可能影響視力。
白內障
若果眼睛嘅晶狀體吸收太多紫外光，晶狀體可能會變得混濁，有機會引致白內障提早報到，或者加重已患白內障人士嘅病情。
黃斑部病變
黃斑部位於視網膜中央，負責中心視力和顏色視力。如果人長時間喺強烈嘅太陽光下，可能會加速眼睛視網膜感光細胞老化，造成黃斑部提早受損和產生病變。
視網膜病變
雙眼長期受過量強烈紫外光照射，而又缺乏太陽眼鏡保護，視網膜就有機會發生病變，嚴重嘅話，仲可能導致視力損失。

希瑪小貼士︰唔好以為陰天就冇紫外光，就算睇唔到猛烈嘅太陽光，紫外線指數都可能好高㗎！所以，喺戶外記得做好眼睛防曬呀！

#眼翳 #瞼裂斑 #翼狀贅肉 #白內障 #白內障成因 #白內障手術 #黃斑部病變 #黃斑病變 #黃斑眼 #視網膜病變 #糖尿病視網膜病變 #糖尿病眼