健康資訊 - 眼妝卸得唔乾淨，可能誘發「眼瞼炎」！

眼科資訊

眼妝卸得唔乾淨，可能誘發「眼瞼炎」！

戴住口罩，眼妝成為唔少女士嘅化妝重點。但要注意︰眼妝卸得唔乾淨，有機會造成「眼瞼炎」

使用喺眼部嘅化妝品，如︰眼線、睫毛液、眼影等，大多數含有化學物質，可能會刺激皮膚。若卸妝時，眼皮或睫毛根部清潔得唔乾淨，殘留嘅化學物可能會阻塞眼瞼嘅皮脂腺分泌出口，導致眼瞼發炎，亦即係俗稱嘅「眼瘡」或「眼挑針」。

初期發炎，患者可以熱敷雙眼，以改善毛囊阻塞，令受阻嘅油脂腺打開，幫助油脂排出，減低發炎症狀。另外，仲可以用乾淨嘅毛巾包住連殼嘅熟雞蛋，喺眼瘡周圍來回按摩5至10分鐘以紓緩症狀。

如果情況冇改善，記得盡快求醫啦。診症時，眼科專科醫生會按患者眼瘡嘅嚴重程度，而建議唔同嘅治療方法，常見處方包括︰抗生素眼藥水、藥膏，或眼瘡刮除術等。

所以，要預防眼瞼炎，卸眼妝時可以選擇用眼部專用卸妝液，記得徹底清潔乾淨眼妝部分啊！

#眼瞼炎 #眼皮發炎 #眼瞼發炎 #麥粒腫 #眼瘡 #眼挑針 #眼皮生瘡 #生眼瘡