健康資訊 - 糖尿眼初期毫無症狀，了解預防糖尿上眼的方法！

眼科資訊

糖尿眼初期毫無症狀，了解預防糖尿上眼的方法！

香港現時有大約70萬名糖尿病患者，當中有三分一可能會出現糖尿上眼（糖尿病性視網膜病變）嘅問題。糖尿眼初期通常冇症狀，患者眼睛唔紅唔痛，視力亦唔會有大影響，所以難以察覺病情。

如果患者血糖控制得唔好，喺糖尿眼後期，眼睛血管內皮細胞可能受到永久破壞，屆時患者會出現眼矇、飛蚊、眼痛、中央視力模糊等症狀，同時引起一連串嘅眼底病變，如：微血管瘤、糖尿黃斑水腫，甚至會出現視網膜脫落或青光眼，嚴重嘅話視力可能永久受損。

預防勝於治療，糖尿病患者要預防糖尿上眼，就要留意以下幾點︰
控制血糖水平，保持血糖指數穩定
定期進行眼底檢查，監察雙眼有冇出現病變
維持正常嘅三高指數，控制血糖、血壓、膽固醇水平
均衡飲食，減少高糖份食物、多選高纖維食品，多做運動及戒煙

若果能夠及早發現糖尿眼，大部分情況都可以進行針對性治療，預防更嚴重嘅病變。如有懷疑，就要盡快聯絡眼科專科醫生進行詳細檢查啦！

#糖尿上眼 #糖尿病視網膜病變 #糖尿上眼病徵 #糖尿眼 #視網膜病變 #糖尿病 #糖尿黃斑水腫 #糖尿病黃斑水腫 #黃斑水腫